Наврўз куни эрта тонгдан Бувайда тумани бўйлаб карнай-сурнай садолари янгради. Бу овоз туман аҳлини марказда жойлашган “Мегапарк” сари чорларди.
“Мегапарк” боғида “Наврўз” умумхалқ байрами муносабати билан 200 килограмм ош дамланиб, байрам сайли иштирокчиларига, бир жойда ётган беморларга, кексаларга, кўмакка муҳтож инсонларга, якка-ёлғизларга “Аёллар дафтари”да, “Темир дафтар”да турган 2000 нафар фуқароларга тарқатилди.
Сайлга ташриф буюрган нуроний отахон ва онахонлар тинч ва осойишта кунларда аҳиллик ва ҳамжиҳатлик, меҳр-саховат байрами – Наврўзни шоду хуррамликда нишонланётганларига шукроналар айтиб , шундай кунларимиз абадий бўлишини тилаб, дуога қўл очдилар.
Боғ тўрида ташкилланган хушовоз хонандаларнинг байрам концерти, халқ ўйинлари, мусобақалар ва кўргазмали чиқишлар иштирокчиларда катта таассурот қолдирди.
