Бу шундай дастурки, пластик картангиздаги миллионлаб пулларни осонлик билан суғуриб олади. Сезмайсиз ва тополмайсиз.
Банкоматларда пластик картадаги маблағларимизни нақд пулга айлантиришда ўйланаётган пайтимизда гўёки ўзини беминнат ёрдамчидек кўрсатганларга ўзимизга ишонгандек ишонамиз, улардан шубҳаланмай, пластик картамизни берамиз, махфий кодимиз-у, телефон рақамимизни ҳам айтиб берамиз. Бизнинг соддалигимиздан фойдаланган нияти бузуқлар эса пинҳона ўғирликлар содир этиб, осонгина мўмай пул топадилар, нафсини яйратадилар.
Фуқаро С. Э ҳам ана шундай йўлни тутди. У ўтган бир йил давомида туманимизнинг барча банк филиалларида шум ниятини амалга ошириш пайида бўлган. “Уддабурон фрибгар” нафақат Бувайда, балки қўшни туманлар – Бағдод, Олтиариқ, ҳатто Фарғона шаҳрида ҳам пластик картасидан нақд пул ечтириш учун банкоматга келган кекса ёки содда фуқароларга ёрдам бермоқчидай тутиб ўзини, эгасининг рухсатисиз ўз телефон рақамига СМС хизматни улаб, пулларини ўзлаштириб олган.
У ҳеч кимдан ҳайиқмай, ўнлаб юртдошларимизнинг пулини ўмарган. Телефон аппаратию компьютер техникасига яхши тушунганлигига ишониб компьютер тизимларига рухсатсиз кирган ва нафсини жиловлай олмай, “1-СУРбет” номли шум дастур ёрдамида жами ўн саккиз млн.дан ортиқ суммани ўзлаштирган.
Ҳеч бир қинғир иш жазосиз қолмайди. Бир йилга бориб-бормай қўлга тушган фирибгар энди бошини чангаллаб, қилган ишларидан афсус чекиб ўтирибди. Ўтказилган тергов ва текширув ишларидан сўнг суд ўз ҳукмини чиқарди: мазкур жиноятчи беш йилга озодликдан маҳрум этилди.
Б. МЎМИНОВ.жиноят ишлари бўйича туман суди раиси
