Ёраб, ул ёрким, кетурга келса имкон айлама,
Ул санамдин ўзгани дил мулкига хон айлама.
Жонига жонимдан ўзга жонни қурбон айлама,
Ёраб, ул ёрким даме кўзимга пинҳон айлама.
Ё кўзумни андин ўзга кўзга ҳайрон айлама.
Ёраб, ул ёр юзига тушса юзум, ул чеҳрани,
Топмагайдур то абад ишқим тўзум, ул чеҳрани,
Юз ижобат айласа чун ёр сўзум, ул чеҳрани,
Чеҳрасига меҳмон ўлса кўзум, ул чеҳрани,
Кўзларимни андин ўзга уйга меҳмон айлама.
Шоҳким, ул ҳар гадонинг ҳолига бўлгай гувоҳ,
Мен гадомен ой юзунгга, сен – чирой мулкига шоҳ
Ташна айлаб сенки ҳуснунг мулкига, ёр, гоҳ-гоҳ,
Очмайин зулфунг паришон кўнглума чектурма оҳ,
Етмайин оҳим ели зулфин паришон айлама.
Иккисидур бир-бирига ошно булбул – чаман,
Завқ ила айлар, ажабким, булбулу гул анжуман,
Жоедурким, ул санамнинг гўша бўлгайдур бу тан,
Бошима кўйидин ўзга кўйини қилма ватан,
Кўйида бошимдин ўзга бошни ғалтон айлама.
Билки, Мухтор, соҳиби бор бўлгай, албат, ҳар гуле,
Шоҳдур ул кўнгилгаким, ишқига бўлгайдур қуле,
Ҳар неча етмакни осон демаким, бор мушкуле,
Истасанг, эй гул, Навоийдек хушилҳон булбуле,
Ғунчадек кўнглин маломат хоридин қон айлама.
©️Мухтор Мирзо Абдулло
Бизнинг телеграм канал👉Buvayda.info (https://t.me/buvaydainfo)
