10 июнь куни ижтимоий тармоқларда ўқувчисининг яқинлари томонидан калтакланган ўқитувчи суратлари тарқалди. Тошкент шаҳар Учтепа туманидаги 62-сонли мактабнинг информатика фани ўқитувчиси 8 июнь куни мактаб ўқувчиси ва унинг оила аъзолари томонидан калтакланган эди.
Жанжалда жароҳатланган ўқитувчи зудлик билан шифохонага етказилган. Воқеадан хабардор бўлган Мактаб ва мактабгача таълим вазири Ҳилола Умарова ҳолатни шахсан ўзи назоратга олганлигини ва айбдорларнинг қилмишига яраша жазо олиши бўйича чора кўришини айтиб ўтди.
Ушбу воқеа-ҳодисага К.Алламжонов ҳам ўз муносабатини билдирган.
“Тошкент шаҳар Учтепа туманидаги 62-сонли мактабнинг информатика фани ўқитувчисини калтаклашда иштирок этган кимки бўлса, уларнинг барчаси қонунда белгиланган тартибда қаттиқ жазоланади. Бу бўйича ҳуқуқ-тартибот органларига керакли кўрсатмалар берилди. Валломати бўлса ҳам ўқитувчини хафа қилишга хеч кимнинг ҳаққи йўқ.” деб ёзади у ўз телеграм саҳифасида.
Тошкент шаҳар ИИБ раҳбариятининг расмий муносабатига кўра, Учтепа туманида содир бўлган мактаб ўқитувчиси ва ўқувчи ўртасидаги ўзаро келишмовчилик сабабли келиб чиққан можаро натижасида ўқитувчи тан жароҳати олганлиги ҳолати юзасидан Учтепа тумани ИИО ФМБ Тергов бўлими томонидан Ўзбекистон Республикаси Жиноят кодексининг 277-моддаси (“Безорилик”) билан жиноят иши қўзғатилганини маълум қилган.
Жиноят иши Тошкент шаҳар ИИББ раҳбарияти томонидан назоратга олинган. Тергов якуни бўйича қонуний қарор қабул қилиниши ва айбдор шахсга нисбатан қатъий чора кўрилиши таъминланади, дейилади муносабатда.
Мазкур модда бўйича, жиноят қилган шахс уч юз соатдан уч юз олтмиш соатгача мажбурий жамоат ишлари ёки бир йилдан уч йилгача озодликни чеклаш ёхуд уч йилгача озодликдан маҳрум қилиш билан жазоланиши мумкин.
Эслатиб ўтамиз, Янги қабул қилинган Ўзбекистон Конституциянинг 52-моддасида, (https://lex.uz/docs/6445145)давлат ўқитувчиларнинг шаъни ва қадр қимматини ҳимоя қилиш белгилаб қўйилган.
